Sophia a’ Cruthachadh Eachdraidh

Bha mi a’ dèanamh ceum ann an àrc-eòlas agus dh’iarr an t-ollamh agam orm modail 3D a dhèanamh de bhall-ealain. Fhuair mi a-mach bho Google mar a dhèanainn sin agus an dèidh beagan mhodailean a dhèanamh, bha mi air mo bheò-ghlacadh leis!

Chaidh mi air adhart a sgrùdadh Maighstireachd Dualchais Dhidseatach mus do thòisich mi mar Thrèanaiche Ùr-ghnàthachais Dhidseatach san Seada Einnsein ann an Sruighlea. An uair sin, bha mi ag obair mar Oifigear Pròiseict mus d’ fhuair mi obair mar Oifigear Ùr-ghnàthachais Dhidseatach. Tha an cothrom a fhuair mi tro thòiseachadh mar thrèanaiche agus sreap suas an àradh, air mo bheatha atharrachadh. Tha e air an dòigh sam bi mi a’ faicinn nan àiteachan mun cuairt orm atharrachadh, agus tha mi air m’ fhìor bhrosnachadh gu na sgeulachdan cudromach mu àiteachan agus nithean eachdraidheil innse. Tha cothlamadh innealan bhiortail is didseatach mar aon dòigh dhomh a bhith comasach air sin a dhèanamh.

Bheirinn iomradh air m’ obair mar: ùr-ghnàthach, atharrachail, agus cudromach.

An seo san Seada Einnsein, bidh sinn a’ cruthachadh mhodailean 3D de làraichean is bhuill-ealain gus riochdachaidhean agus clò-bhualaidhean dhiubh a dhèanamh. Gus làraichean àrsaidh a mhapadh, bidh sinn a’ cleachdadh sganair a tha a’ cur a-mach gath leusair a tha a’ leum dhen uachdar mus tig e air ais chun an inneil aig astar de aon mhillean uair gach diog, le mionaideachd a tha do-chreidsinneach. Ri taobh foto-gramatraidh agus filmichean dròn, tha seo a’ ceadachadh innich fhoto-fìorail sàr-mhath do nithean leithid fìorachd bhiortail. Tron seo, tha mòran de ar làraichean mar thaighean-tasgaidh dhiubh fhèin! 

Is e an t-amas gun na nithean bunaiteach ionadachadh, ach d’ eòlas orra a neartachadh. Tha a bhith air ar cuairteachadh le daoine a tha air am brosnachadh gu an eòlas teicnigeach a roinn aig mòr-ionad do obair-lannan speisealaichte, gar cuideachadh le coimhead às dèidh ar dualchais do na ginealaichean ri teachd. 

Aig aois còig bliadhna, bhithinn cho beò-ghlacte leis an obair a tha mi a’ dèanamh an-diugh. Tha e an-còmhnaidh ag atharrachadh, tha nithean ùra ri ionnsachadh an-còmhnaidh agus tha cothrom agam snàgadh mun cuairt ann an àiteachan a tha fìor thlachdmhor air feadh Alba mar Maeshowe, a tha na thuama le seòmraichean ann an Arcaibh agus Skara Brae, baile a tha 5,000 bliadhna a dh’aois air an eilean cheudna. 

Fhad ’s a tha mi aig na làraichean dualchais sin, tha mi air mo ghlùinean ’s mo làmhan a’ snàgadh sìos thrannsachan gus faighinn a-steach do na h-oiseanan airson mapadh didseatach. Bha cuid de na ballachan fiù ’s air an còmhdach le graifiti Lochlannach!

Is e an nì as fheàrr leam mun dreuchd agam a bhith a’ gabhail ri eileamaidean bho ghnìomhachasan eile leithid gèamadh is togail-dhealbhan, agus a’ faicinn mar a tha iad co-cheangailte ris an roinn dualchais. Mar eisimpleir, bidh mi ag obair le clachairean gus teamplaidean 3D a chlò-bhualadh as urrainn dhaibh a chleachdadh, seach a bhith ag obair bho dhealbhan 2D - tha e fìor riarachail. 

Tha meas mòr agam cuideachd air mar as urrainn dhomh fhaicinn mar a tha eachdraidh gar ceangal ris an àm a dh’fhalbh agus ris na daoine mun cuairt oirnn, agus a’ cleachdadh sin gus sgeulachdan ùra innse mu nithean aosta.

Tha a leithid de mhòmaidean air a bhith ainmeil nam dhreuchd, a’ gabhail a-steach a bhith ag obair gus Glainne Ioslàmach Caisteal Chair Labharaig ath-thogail - prìomh eisimpleir de mar as urrainn dhuinn càch a chuideachadh gu tlachd a ghabhail às ar dualchas le bhith ga dhèanamh ruigsinneach. 

Ach is e as fheàrr leam buileach, na daoine leis a bheil mi ag obair agus na h-àiteachan air a bheil cothrom agam fhaicinn. Tha cothrom agam cluich le mòran teicneòlas ùr agus eadar-obrachadh leis an Seada Einnsein, ach ann an da-rìribh, ’s e na daoine agus na h-àiteachan a tha ga dhèanamh cudromach.