Obair a’ tòiseachadh air an Talla Mhòr ann an Caisteal Chiosmuil

Bidh an obair a’ coimhead ri eadar-theachdan ùra a chur an gnìomh gus dèiligeadh ri draghan mun choncrait agus na bàraichean ath-neartachaidh a-staigh. Thèid dàrna structar a stàlachadh fon choncrait a th’ ann mar-thà, a’ cleachdadh stuthan neo-iarannach, fiodh agus obair-bloca, a bhios nas fhreagarraiche don àrainneachd ionnsaigheach mhara. Ceadaichidh seo do HES tuilleadh obrach a tha riatanach taobh a-staigh a’ Chaisteil a choileanadh. 

Tha e tuairmsichte gun toir an obair san Talla Mhòr suas ri trì seachdainean a chrìochnachadh.  

Tha seo a’ leantainn air gnìomh toinnte an lùib nithean eachdraidheil ath-ghluasad rè ùine bhon Talla Mhòr gus dèanamh cinnteach gum bi iad air an dìon fhad ’s a tha an obair a’ dol air adhart. Am measg a’ chruinneachaidh de bhuill-ceàirde ann an sealbh MhicNèill Bharraigh, tha sia musgaidean, dà aileabart agus armanach dhrùidhteach.  

Tha na musgaidean agus na h-aileabartan air an comharrachadh le cinn-latha bho 1742 agus 1743, gan toirt air ais gu àm Aramach nan Seumasach. Tha an armanach, gearradh-arm a tha air a pheantadh ’s air a dhealtrachadh, a’ gabhail a-steach dhealbhan de Leòmhann na h-Alba, soitheach le crann agus Caisteal Chiosmuil, a chaidh a bhuileachadh air Clann MhicNèill ann an 1968. Thug a’ ghnìomhachd ath-ghluasaid cead air pàipearachd nam ball-ceàirde ath-ùrachadh le dealbhan agus tomhasan ùra, agus sgrùdaidhean air an staid a choileanadh.  

Tha an obair seo mar an ath ìre den cheann-uidhe fad-amail aig HES a thaobh Caisteal Chiosmuil ath-fhosgladh do luchd-tadhail aon uair ’s gu bheil e sàbhailte sin a dhèanamh. An-uiridh, ghabh sgrùdaidhean Clachaireachd Àrd-Ìreil, agus obair co-cheangailte, àite air taobh a-muigh a’ Chaisteil. Bha na h-obraichean sin mar thoiseach tòiseachaidh air prògram airson dèiligeadh ri draghan co-cheangailte ri concrait agus bàraichean ath-neartachaidh a’ Chaisteil, a’ leantainn air ath-leasachadh mòr san 20mh linn, a thuilleadh air buaidh salann is taiseachd bho làrach cladaich Caisteal Chiosmuil.   

Sa Mhàrt am-bliadhna, rinn HES càraidhean air an laimrig, a chuidicheas le slighe a-steach do luchd-tadhail a dhèanamh nas fhasa aon uair ’s gum bi an Caisteal air fhosgladh a-rithist.    

Thuirt Seumas Mac a’ Phearsain, Ailtire Sgìreil HES:  

"Tha sinn air leth toilichte a bhith ag adhartachadh obair air taobh a-staigh a’ chaisteil, nì a tha na phrìomh chlach-mhìle nar prògram de dh’obair glèidhteachais agus na cheum eile air adhart nar planaichean fad-amail a thaobh Caisteal Chiosmuil ath-fhosgladh do luchd-tadhail.  

"Tha sinn a’ gabhail ris gu bheil coimhearsnachdan Bharraigh is Bhatarsaigh dealasach a thaobh Caisteal Chiosmuil a mhòr-thaisbeanadh do luchd-tadhail a bhios a’ tighinn bho gach ceàrn den t-saoghal, agus leanaidh sinn ag obair gu dlùth leis a’ choimhearsnachd ionadail. Tha sinn toilichte tursan bàta seusanail a ruith an-asgaidh timcheall a’ bhàigh agus a’ Chaisteil a-rithist am-bliadhna agus an dòchas gun còrd e ri luchd-tadhail a bhith a’ rannsachadh na sgìre fharsaing fhad ’s a tha cead-inntrigidh don Chaisteal cuibhrichte aig an àm seo.”  

Is sinne am prìomh bhuidheann airson àrainneachd eachdraidheil Alba, carthannas a tha air a shònrachadh do dh’adhartachadh air dualchas, cultar, foghlam agus dìon àrainneachd. Tha sinn air thoiseach le rannsachadh air agus tuigse don àrainneachd eachdraidheil agus le dèiligeadh ri buaidh atharrachadh gnàth-shìde san àm ri teachd. Bidh sinn a’ sgrùdadh agus a’ clàradh làraichean is chruthan-tìre ailtìreil agus arc-eòlasach air feadh Alba, agus a’ toirt cùram do chòrr air 300 làrach de chudromachd nàiseanta. Tha HES cuideachd ag obair còmhla ri com-pàirteachaisan san roinn gus an ro-innleachd airson àrainneachd eachdraidheil na h-Alba, Ar n-Àm a dh’Fhalbh, Ar n-Àm ri Teachd, lìbhrigeadh.

Tha Alba Aosmhor, Scran (Lìonra Chothroman Ghoireasan Cultarach Alba), Canmore, Cruinneachadh Nàiseanta Dealbhadaireachd Adhair (NCAP), An Seada Einnsein, Caisteal Shruighlea agus Caisteal Dhùn Èideann mar fho-bhranndan de Àrainneachd Eachdraidheil Alba.

Tuilleadh mu ar oifis conaltraidh

Clàraich airson ar brathan-naidheachd

Airson tuilleadh fiosrachaidh, cuiribh fios gu:

Oifis Mheadhanan Àrainneachd Eachdraidheil Alba
Fòn-l: 07721 959 962
Post-d: communications@hes.scot