About Us

Turasachd Dualchais

A bheil ùidh agad ann a bhith ag obair ann an àiteachan mìorbhaileach leithid caistealan, abaidean, lùchairtean, blàran-catha, dùin Aois an Iarainn, muilnean agus taighean eireachdail? Am bu thoigh leat fàilte a chur air luchd-turais bho air feadh an t-saoghail? A bheil thu dìoghrasach mu d’ fhèin-eòlasan, d’ fhiosrachadh a roinn agus beatha dhaoine a shaidhbhreachadh? Ma tha, beachdaich air dreuchd ann an Turasachd Dualchais!

Tha dreuchdan an lùib luchd-tadhail leithid stiùireadh chuairtean, ceannach, agus inntrigidh, aig teis-meadhain obrachadh air làraichean dualchais bho latha gu latha. Faodaidh iad a bhith trang aig amannan, ach cuideachd fìor luachmhòr. Tha dreuchdan mar seo an sàs ann an conaltradh ri luchd-tadhail, obair ann am bùithtean, stiùireadh chuairtean làraich, agus cuideachadh le sàbhailteachd agus tèarainteachd luchd-turais. Gle thric, chan eil feum aig obraichean mar sin air eòlas farsaing ro-làimh no teisteanasan, agus mar sin faodaidh iad a bhith nan slighe math a-steach do dh’obair ann an àrainneachd dualchais. Aig ìre nas àirde, faodaidh tu a bhith an urra ri làrach shònraichte, no fiù roinnean nas motha, agus faodaidh obair a bhith an lùib brosnachadh sgiobaidhean làraich agus leasachadh ro-innleachdan turasachd tar-chuimseach.

Tha gu leòr obraichean ann an turasachd ‘air cùl gnothaich’ cuideachd – an còrdadh e riut a bhith ag obair anns na meadhanan sòisealta gus culaidhean-iongnaidh dualchais a roinn air feadh an t-saoghail, no siubhal thall-thairis gus ruighinn a-mach gu luchd-èisteachd cruinneil? Is dòcha gu bheil thu airson ballrachd a bhrosnachadh gu culaidhean-iongnaidh no tachartasan poblach agus prìobhaideach a chur air dòigh aig na h-ionadan sin? Tha seo uile agus barrachd comasach le dreuchd ann an Turasachd Dualchais.

Tha seirbheis luchd-ceannach agus sgilean conaltraidh cudromach airson na mòr-chuid de dhreuchdan taobh a-staigh an raoin seo. Tha a bhith dìoghrasach mu far a bheil thu ag obair, na chuideachadh cuideachd!

Eisimpleirean de dhreuchdan:

  • Cuidiche Aghaidh Taighe
  • Stiùbhard Làraich
  • Stiùiriche Chuairtean
  • Manaidsear Obrachaidhean Luchd-tadhail
  • Oifigear Chonaltraidhean
  • Co-òrdanaiche Inntrigidh
  • Manaidsear Thachartasan
  • Cuidiche Ballrachd
  • Comhairliche Malairt Siubhail
  • Manaidsear Leasachaidh Turasachd

Dè a-nis?

Faodaidh tu tagradh a dhèanamh airson mòran dreuchdan luchd-tadhail air an làraich. Tha obraichean seusanail nan dòigh mhath air tòiseachadh agus an t-eòlas a thogail air a bheil feum airson dreuchd nas fhad-amaile. Faodaidh teisteanasan ann an aoigheachd, turasachd, no stiùireadh thachartasan a bhith feumail airson dhreuchdan nas àirde.

A’ coimhead airson obraichean? Sgrùd am fiosrachadh air na làraichean-lìn seo: 

Soillse air Dreuchdan

Carson nach cluinn sibh bhuapasan san roinn mu chuid de na mòran dreuchdan a tha rim faotainn ann an turasachd?  

Update your third party preferences to view content

Àrd-Stiùiriche aig Tursan Mercat

Is e obair spòrsail a th’ ann an stiùireadh thursan oir is urrainn dhut do dhìoghras don bhaile agad a roinn, le bhith ag innse sgeulachdan fìor bhon àm a dh’fhalbh. Tha thu cuideachd a’ faighinn mòran eadar-dhealachaidh san latha agad, a bhith air a’ bhlàr a-muigh agus coinneachadh ri daoine bho air feadh an t-saoghail.

Is e aon nì airson ionnsachadh, gum faod cha mhòr nì sam bith a tha a’ còrdadh riut a thionndadh gu obair ann an turasachd. Tha e fosgailte, tha e fàilteach, tha e sùbailte, agus ge ’r bith càite an tèid thu, cho fada ’s a tha dòigh-smuaineachadh dheimhinneach agad, gheibh thu cuideachadh le fàs, leasachadh agus a bhith cho math ’s as urrainn dhut.

Mar eisimpleir, mas e neach càirdeil a th’ annad agus meas agad air coinneachadh ri daoine, tha turasachd dhutsa. Bidh tu ag obair le càch san sgioba agad agus a’ cur fàilte air daoine bho air feadh an t-saoghail a tha a’ tadhal air a’ cheann-uidhe agad. 

Chan e sin a-mhàin, ma tha thu measail air siubhal, faodaidh tu do dhreuchd ann an turasachd a ghabhail agus atharrachadh gu àite sam bith air an t-saoghal, gus am faod thu a bhith ag obair agus a’ siubhal aig an aon àm.

Gheibh thu riarachadh mòr san obair ann an turasachd mas e neach cruthachail a th’ annad. An toigh leat margaideachd no meadhanan sòisealta? Mas toil, dh’fhaodadh tu a dhol an sàs ann an dealbhadh làrach-lìn, stiùireadh mheadhanan sòisealta, no conaltraidhean. San obair seo, bidh tu a’ cleachdadh do sgilean cruthachail gus ceangal a dhèanamh le daoine agus dèanamh cinnteach gum bi cuimhne fìor mhath aca air a’ cheann-uidhe agad.

Ge ’r bith dè na nithean as fheàrr leat agus d’ ùidhean, tha obair dhut ann an turasachd!

Share